（受史兄影響，寫篇含粗口嘅口語文，發洩下，唔啱好close。）三十有二，按好多人講法，我都係唔撚化。
我好坦誠我係雙面人，但唔係假嗰隻，點解？我係喺工作上同平時會有唔同嘅表達，係，即係好似半澤直樹係公司同對住佢老婆有兩個樣咁。
具體講。
我對朋友點，識我耐嘅心中有數，要我簡單形容自己，我就會話自己玩得多水吹，口賤無聊感性但唔計較。不過即使我話我係點，總有人會講另一套，然後背後話你點點點，總之唔係好嘢，所以我已經好多年冇理，反正，我不過是個凡人。
你可以話我鴕鳥，又可以話我孤僻，我冇所謂，某些年前有前輩教我，最緊要過得到自己，做人起碼要自己做得開心，做得自豪，話我係怪人，我認。總之一句，做朋友最緊要唔駛估估下，唔駛收收埋埋，即係「真」係好緊要。
工作上呢？我好有原則，講規舉，好有動力，要衝，要發圍，對公司永遠有感情，可惜往往成為最大弱點。以前會要求同工一齊提昇，而家明白律己以嚴，待人以寬，所以只會對自己有要求。
因為一尐往事，我盡量都唔會同同事有咩感情，雖然到而家都仲係學緊點同同事保持距離但又唔會疏得太遠，但我仲係要好努力避免犯呢個錯。我宗旨係公司就係公司，老闆同員工係合作，你付出人工，我付出勞力，就係咁簡單。唔好諗我太多，我好簡單，我係求財，唔係求氣嗰堆。
可惜大部份人已經接受咗，老闆同客係神，即係佢哋有幾無理嘅要求，你都唔可以推，即使明明個要求係錯，係損害公司利益。我睇公司係一個整體，大到係如果我阻住公司發展，我願意走嗰隻。但係人都係自私嘅，同事為咗保住飯碗，乜撚都做得出；老闆要賺到盡，對伙記有幾賤都得。
你班順民敢反抗咩？每次我同人講，都只係俾人冷笑，或者話我：「戇撚鳩。」
講真，我都慣。已經唔係尊唔尊重嘅問題，而係點解明明係錯嘅嘢，要扭曲自己去就？我突然好明《海虎》入面黑暗喺精神病入面所領悟嘅嘢。唔明？簡單咁講，係一個痴線嘅地方，你所謂嘅正常，其實先係痴線，問題係你睇得幾通幾透，仲幾有堅持。
舉個例，開會。我唔知點解好多老闆鍾意拉晒全世界開會，關唔關事都好，總之入咗房先。冇議程，即興。開會又冇乜人肯講嘢，因為講乜都會俾上頭ban，廢撚事講。開會時尐人唔係發夢就玩電話，開兩三個鐘會，但係冇結論，有都係求撚其嗰隻。最大撚鑊係，仲要永遠都冇會議紀錄，即係下次又loop返同一個問題，或者做嘢根本唔係跟開會個結論做，甚至有尐仆街到係開完會唔啱心水，就入老闆房自己搞掂。
你話呢尐會開嚟做乜鳩？
呀，仲有。開會因為有好多唔關事嘅人存在，老闆又鍾意懶民主「徵求」大家意見，啱佢心水就民意，唔啱呢？「我決定咗係咁就係咁。」完。而因為好多人本身都唔關事，又唔想得失老闆，所以俾意見都只係「我覺得」，但冇實質理據去支持，而佢哋更唔係專業。唔怪得嗰尐同事，因為我知佢哋都唔想，但當你久而久之聽尐永遠只係「我覺得」嘅意見而並無論証支持，呢種「討論」只係嘥鳩氣。最仆街係，駁佢只會被冠上「唔聽人意見」之名，真係多撚謝晒，認同佢又過唔到自己，吹鳩漲。
大佬呀，立法會開會咪就係咁囉，唔撚識係度吹水，講嘢唔係痴孖筋，就係一舊雲，言之無物，仲要潑婦罵街咁。睇得多我諗思維同智力會減得勁過天線乜乜B。
只可惜，我呢尐「契弟」係唔撚明，做嘢唔係求結果嘅工作我真係唔撚識做。諗咗一日，都係睇唔透，明明我飲係sake，但我覺得濁過嗰杯青島。
諗諗下，咁撚辛苦，不如唔好諗，聽下歌，唱下歌，瞓。
最後一句，契弟就係契弟，講咁多咪又係要返工，鬼叫你窮呀。
