今日睇咗篇文，有感而發，先引文：「令人噁心但肉體很迷人」 外國人眼中的台灣女人。偏唔偏激，過唔過火，閣下自行判斷，我只係想講下一啲無聊嘢。而為咗傳神，又係廣東話時間，仲要有粗口，小心慎入呀下，等我扮下潮文先。
確實好多人美化咗台灣妹，話台妹又靚又索又溫柔，同港女冇得比。但調轉諗，其實係好假下，特別係啲娃娃音，對唔住，頂唔撚順。據台灣朋友話，其實台灣女仔同港女好多都一樣現實，分別係台妹門面功夫做足好多，港女真係會當自己係公主，乜都「老奉」。當然，每個地方都有好人壞人，一竹桿打一船人，未必適當，但又唔怪得上面篇文有人咁講，特別係喺夜店識嘅女仔。
就係因為啲人成日覺得台妹正，所以有人話，去台灣唔去蒲，同冇去過冇分別。引下你哋，自己按Link睇下，自行判斷。問我點睇蒲呢家嘢？我又唔鍾意蒲，連《喜愛夜蒲》都冇睇，唔蒲開嘅我當然唔會認同啦，但可以講下感受嘅。
蒲對唔同人定義可以好唔同，我唔define喇。有人蒲吧、蒲disco、蒲club，我哋呢啲以前最多蒲機舖、而家舖飛鏢道場嘅，完全唔會明嗰個領域。但可以咁講，蒲唔一定係壞，但壞嘅多數鍾意蒲。
識我都知我係冇乜點蒲，對上一次都係嚟台灣，已經係六年前，啱啱失戀，就俾人捉咗去當年台北最大嘅disco Luxy見識見識，俊男美女乜都有，確實係大開眼界，但此行更認識自己想要啲乜、唔想要啲乜。唔明我講乜？簡單啲諗，你介唔介紹自己女朋友爛蒲爛玩俾人摸身摸世？我膚淺，介意，就係咁簡單。所以我唔啱蒲，亦冇期望過會喺入面有咩發生。
今次去台北，第一個星期係做嘢，同事撩落酒吧都係飲兩杯，算唔上蒲。之後預去台東，臨行前一晚係台北匯合朋友，我冇行程，因為第二朝六點就要上火車。其中一個朋友嗰晚做咗個好大膽嘅決定（後簡稱佢叫W），因為佢嘅台灣朋友生日，叫埋團友一齊去party，之後直接上火車先瞓。就咁，我哋就一齊去咗京華城一間disco。
台北嘅星期五、六同平日分別真係好大，酒吧等夜店係呢兩日嘅人流同平日冇得比（因為同同事有一日平日同星期五去咗酒吧飲嘢，場面係差天共地）。十一點幾去到京華城，多人到癲，好彩係有人book咗枱，唔係門口條龍，見到都唔想排。
入到去，嘈到拆天（廢話）。同上次去Luxy唔同，感覺呢邊平民好多，都係一般搵食男女咁嘅feel，上轉去Luxy，model都一大堆，啲衫仲要浮誇好多。而家係點就唔知了，但忠孝東路四段嗰邊少咗好多酒吧就真嘅，的士佬話，而家想飲酒要去101嗰邊，會多啲。
去disco其實對我嚟好悶，係，仲要係好撚悶嗰隻。對於我嚟講，disco係一個發洩生理，或值住生理嘅發洩去平衡心理嘅地方；至少今次個朋友係，佢後尾話我知工作唔開心，想醉下攬下女仔。所以，好彩我係度，唔係真係冇人抬佢走。
簡單啲講，disco係一個最原始啲森林，求慾、獵食，要飲酒嘅飲酒，你會見到啲人狂飲酒飲到醉，明明嘔到九彩都仲要飲。要猜枚嘅猜枚，要媾仔媾女嘅媾仔媾女，直接、簡單，都係尋歡作樂，冇高低，只有手段同賣相。你唔會以為去disco真係想跳舞掛？
講返轉頭，落到去，W其中一個台灣朋友就對我哋兩杯，然後用佢唔咸唔淡嘅廣東話打個招呼，哈哈哈就坐底。我唔明台灣人點解咁鍾意學廣東話，仲要淨係粗口。一輪魚蝦蟹同飲咗兩杯之後，就已經冇乜話題。佢話嗰晚啲friend大部份都係同男朋友一齊，冇乜好玩，就咁捉咗我哋出舞池。
落去舞池跳舞？痴線啦，個個都係郭富城咩。你會見到好多人落舞池只係郁下個身，再睇下會睇到啲男仔係後面磨啲女仔，受嘅就開始互摸，唔受嘅就叫佢彈開，然後個男仔又搵下件獵物。郁下個身，我呢個老人家就返去坐，佢哋之後點？由佢哋帶住呆滯嘅目光一條友返嚟，我估冇囉。但講真，感覺自己老之外，由頭到尾都覺得自己唔屬於呢個地方；煙、酒、一夜情，我冇一樣好，賣相嘅話，我又唔覺得肥仔有好大market，所以我實在唔明點解自己係嗰到。
坐坐下另一個台灣仔見我哋幾條香港仔坐係度戇鳩鳩就走埋嚟吹水，原來係竹昇仔嚟，結果係講英文。佢教我哋係嗰到媾女，一定要有自信。佢話gals in there are bitches. No one will care where you from, what your job is. They just desire your body, so, just fuck it! 好直接，直接到我唔識俾反應佢，係咁笑下就算。但如我所講，嗰到係一個原始森林，男人都會係到變成狗公，所以只要心裡沒有迷惑，你就會知點道自己想要啲乜，好似我之前咁講，你會明點解我唔去蒲架喇。
跟住就係睇下人生百態囉，有媾仔媾女嘅，有拉入廁所埋牙嘅（嗱，即係咁，個廁所得一格同一個尿兜，咁我係尿兜揸緊水望到地下有兩隻腳唔係向住個馬桶，然後突然多咗兩隻……咁可能人多又人有三急，兩個人又唔介意，咪要用同一格廁所囉），有飲到劏嘅。不過真係有好多人攞住部電話篤篤下，幾潮。最後，清醒嘅我「的」咗個半醉嘅friend閃人囉，之後食個早餐，執埋嘢就上火車呼呼大睡，瞓醒我已經係一個只有藍天同大海嘅地方，開心到爆。講堅，呢啲先啱我架嘛。
故仔講完，預咗俾人屌鳩我冇甜故聽，不過咁，我哋呢啲老人家都係想「些呀」下，等大家唔好諗得去蒲係好好玩，啲女係好大咬好易「卓」。篇嘢其實幾無聊，寫完其實想delete咗佢算，不過又唔捨得咁多字。介紹你重溫下《晚九朝五》同《台北晚九朝五》呢兩套電影，咁你會對夜蒲有更多嘅思考空間。多謝你有心機睇晒呢篇文，下次希望寫得有趣啲，早抖。
