突然有感而發，為更傳神，本文將以廣東話撰寫，敬請見諒。
從事Marketing嘅工作只有約兩年，但深切體會到呢個世界真係乜嘢都講包裝。明明大家賣同一件嘢，A牌子賣$500，B牌子賣$700，點解？因為就係Marketing嘅功勞，令到買嗰個覺得B牌子賣嘅係唔同。
從我做設計多年嘅經驗得出，就係好多時點解見人哋做啲嘢明明好流，但收錢貴自己十倍，原因就係形象。Marketing做得好，無往而不利，就係呢個原因，我轉咗行，係呢個領域仲大把嘢要學、想學。
我好鍾意睇日本仔做呢方面嘅嘢，講包裝，日本真係世界第一。得罪講句，有時覺得做Marketing係幾無恥，洗腦、扭曲、置入，無所不用其極。
舉個例，SONY做專業級相機只係好近年嘅事，仲要係買人哋返嚟嘅，但你真係唔佩服日本仔係唔得，睇下呢條LINK：http://www.sony.net/united/clock/locations/，咁樣SELL相機，真係冇得輸。唔明？CLICK到入去睇，再SCROLL下你隻MOUSE，自然會明，仲會拜服。
唔信？再俾多條LINK你，真係荒毒你唔死：http://www.sony.jp/ichigan/message/。搵北川景子加隻貓SELL相機，真係男女通吃，點解？男嘅，你會想你影緊嗰個係北川妹；女嘅，你會想自己係佢咁，寫意、自在，仲有貓仔陪住你周圍去。至少就算唔好北川，都唔會話反感，仲搞到Panasonic都要搵綾瀨遙頂一頂，你話係咪冇得輸。呢種置入式行銷手法，確實日本仔係好拿手。
再唔明？睇埋下面條片，嚟緊12月出嘅DSC-RX1，一部Full Frame搭支蔡司鏡嘅「屈機」一體式相機。單睇規格，你會話佢痴X線，但佢嘅Marketing策略，我敢話佢會令你覺得佢值。
老實講，段片真係學AV Buzz呀巴斯講果句，Set行晒嘢，阿水都拍到啦，但你睇完，又真係會信佢部機就咁拍都拍到囉。
過兩萬仲要冇得換鏡，好多人都會話唔值，當連Leica X1 / X2都唔敢去到過HKD20,000呢個水平，FujiFilm X100賣一皮嘢都俾人話貴時，SONY佢就敢做呢啲「痴孖根」嘅產品出嚟。但你有冇留意到，其實SONY佢出呢部嘅目的，或多或少唔係銷售，而係「洗底」。
點解咁講呢？可以見到，SONY做咗好幾年，始終個格調都係比人覺得次Canon同Nikon一等，原因除咗佢做相機呢行較新之外，亦加入好多方便入門使用者嘅原素。要知道人係好犯賤，你啲嘢越簡單，佢就覺得你越唔專業，因為當人人都做得到，「專業」就變得唔值錢；之但科技進步嘅可愛之處唔係就係咁咩？
好似拉遠咗，講返正題先。
SONY呢次出機，除咗我上面講話「洗底」，我覺得仲係「示威」，話俾你其他廠知，佢已經有技術同硬件去挑戰龍頭地位，而且，佢仲有「吉士」做出嚟，真係大大聲講：「吹咩？」都仲得。所以話，SONY個Marketing一直都好勁抽，小弟服到不得了。
普通嘅產品有好嘅Marketing，真係會「升呢」，而本身好嘅產品再加上好嘅Marketing，結論就真係冇得輸。我希望我可以做得更加好，學更多，用更多。
