係舊公司兼職做過幾件產品，以下係其中一件。雖然我唔識畫3D圖，但外觀、功能、對象等等，我都一早諗定晒。所以見到下面呢隻MiniQ Match!!，由構思、產品設計到包裝都一手包辦嘅「親生仔」出世，其實真係好開心，只係遺憾做唔到宣傳推廣，睇唔到佢點賣，但我都會祝福佢賣得好的。
人浮於事，其中我唔開心嘅係有人仍然亂改一尐既有嘅決定。改咗乜？原本嘅光油變咗啞油，連包裝都轉埋用咗啞膠，同埋尐顏色同我諗嘅有出入。決定用光油係因為唔想同另一款撞，另一個原因，本來呢隻嘢出嚟係食住iPhone 5c條水，冇理由用啞色。顏色唔準係廠問題，係控制範圍以外嘅嘢，好難搞，非戰之罪，但真係唔知點解走得好離譜。當然延期係一大問題，如果唔係我應該趕得切幫佢做埋Ad同Promotion。
我當然唔係話自己嘅嘢唔改得，咁諗我嘅人只係佢膚淺；前題係我做每個決定都有做過資料搜集，有前因有後果，唔係一句我鍾意就決定。市場主導都有分，個市場係由你主導，定係個市場主導你。我明冇可能個個都係Apple、Sony帶住個Market走，但唔該，我都唔會盲咁淨係跟住市走。消費市場永遠要平，咁係咪等於貴嘢會冇人買？前題係你點present你賣得貴；我講緊唔係賣到天價嗰種貴，而係合理。試諗下，做電子產品，貨價、設計、技術、保養維修等等問題，利潤竟然唔及成衣三份一，甚至更多。有好多商舖係亂嚟，一隻執廿蚊，鬥平，結果會點？成個行業會死晒，即係玩完。要怪只能怪中國人做生意係咁，所以話中國人係蝗蟲，其實某情度上係好中point。
另一隻都係我搞嘅，仲耐，真係10月懷胎，差唔多成年先見街嘅ProMini X系列，雖然未去到我最理想嘅效果，但都算係唔錯。做唔到係乜？一係燈號唔夠光同均勻，二係我本來有做鏡面俾女仔用嘅，三就係條邊修唔到，我希望仲有一條斜邊，令成件產品出咗嚟，又華麗尐，可惜工廠話唔得，搞唔掂。
返返去個問題，要決定一件事，討論永遠係要攞理據辯駁，唔係身份地位問題，唔係你係老闆、上司、阿邊個邊個就大晒。可惜，我見太多，亦遇太多，無能為力，只能提自己唔做呢尐人。所以，我鍾意一句話：「真相係越辯越明的」，據理力爭，總會係討論過程中找到出路，各位打工又好，做老闆又好，《出師表》孔明講番說話其實好啱，共勉之。
