（受史兄影響，繼續口語mode，亦夾雜住粗口，唔好見怪。）見朋友share呢篇嘢，唔對路，一睇，真係「屌」咗出嚟。結果我只係睇到第二版就飛，篤到最尾，都係嗰尐廢話。有興趣自己睇：http://m.businessweekly.com.tw/BlogArticle.aspx?ID=5012&pnumber=1
篇文好似係節錄，表面上好上進好積極進取，好勵志，實際就係將老闆尖酸刻薄同扭曲嘅思想合理化，叫你班人一係自己發圍，一係就打死一世工。
佢立論係，呢個世界冇好老闆。某程度上我認同，但又某程度上唔認同（你講晒啦…）。
有句說話係前輩教我嘅：「全世界做老闆，你就仆街冚家剷了。」即係好似打將，全部都係將軍，咁邊個衝鋒陷陣？人有高低，物有長短，有自知，先係生存之道。
我唔係睇低人，我更好相信人有無限可能添，你有睇《海虎》就會明，人係會破星嘅。但有樣嘢，唔係個個人走得甩，嗰樣叫際遇。咁講好似唔係幾好，但老實講，天時、地利、人和，英雄能造時勢，但往往係時勢係造英雄。唔明？你睇王維基就知。
我自己本身都從來唔係一個安於現狀嘅人，但我亦冇睇低過安份守己嘅人；至少，冇最底層勞動人口，社會生產力會減低。好似而家中國咁，冇農民，人人賣地起樓暴發，唔好話我口臭，一出現糧食短缺，你班強國人準備仆街啦。
篇嘢將老闆仆街合理化，話係時而勢易。我聽好多人講，以前尐老闆好有人情味，你做得嘢？獎俾你，打本俾你做生意。就算你唔係咁叻，對公司忠心，一樣衣食無憂。以前尐老闆會搵夠，會交棒，會享受生活，貧富差距冇咁大。而家呢？賺到盡，地產霸權點嚟？咪就係貪得無厭。係個社會有錢係大晒，吹咩？
「唔鍾意你咪唔撚好做。」我聽過好多老闆講呢尐嘢。無論幾唔會理，幾仆街，老闆就係一切。但就係呢種心態，令社會而家憎人富貴厭人窮。
唔知幾時開始，尐老闆以為自己係超人，個個都十項全能，乜都識，乜都有眼光。如果你係老闆有咁嘅心態，你不如買馬或者股票，搵多錢好多。你出錢請人返嚟，係做尐你做唔晒，或者唔識做嘅嘢，一個人得一對手一對腳一個頭一碌鳩（或者係女人就冇，多對奶囉…），食幾多用幾多有極限。我就係唔明，有尐老闆可以sales、marketing、production、accounting、HR同admin一個人搞晒，我當你真係識晒，你一日24粒鐘架咋，咪玩啦。
你話天真都好，我覺得社會唔應該係咁，企業更唔應該係咁。
企業唔係應該對社會有責任咩？老闆唔係應該要經營好企業，令公司賺錢，員工又有飯開咩？知人善任，管理得宜，先係將才；做老闆冇嘅話，我唔覺間公司會做得幾好。但又要記得，正因為難求，所以老闆先至難得，先至受人尊重。
低層次尐，人為財死，有錢駛得鬼推磨。每個人都有個價，做伙記當然唔好自視過高，但做老闆亦唔好用到盡，留得住人材，公司先會大。「You have well pay for it.」Well唔well，係共識。做老闆唔好大大聲話「我有出糧俾你」，因為你伙記係有做嘢俾你，仲有，佢有冇做嘢，你都係買緊佢時間。有時尐嘢，互相尊重係好緊要，大家好嚟好去，咁講丫，老闆對伙記好，好多人想跟一世架。
結論都係嗰句，唔好諗住做老闆係高高在上，勞資雙方係合作，唔係支配，尊重係互相嘅。睇下《半澤直樹》啦，請到呢尐伙記，你真係三生有幸呀（前題係你唔係大和田）。
