用iPhone，其實同造愛一樣，冇乜太多人想用「套」，因為Apple嘅產品雖然留有其他廠商出配件嘅空間，但眾所鳩周知，產品一出來已如藝術品般，加多、減少，其實都唔及「裸跑」暢快。以往幾代iPhone還好，小心啲用，仲可以避免損傷；但今代iPhone 5外殼採用電鍍上色，全黑機身的確好「靚仔」，但即使點小心，也實在太容易受傷。
「受過傷，先知道要堅強。」用iPhone 5唔用套，同唔帶多舊電出街一樣，只係同自己鬥氣，除非你有磨花嘅覺悟，又或者可以豁達到某啲人咁花晒都唔理。所以，戴返個「膠笠」真係安全好多。
上次講過Bumper，係，我鍾意用Bumper多過殼，因為跌嗰下真係頂得兩嘢，但缺點就係會令部電話表面積大咗，如果唔係iPhone咁窄身，我諗我都唔會用。咁殼呢？基本上有軟殼、硬殼同全包幾類。全包即係點呢？咪好似本記事簿咁，有埋個蓋揭下揭下嗰隻囉，亦係我最唔鍾意、但又好多女仔用嘅類別。
所以，我今次主要講軟殼同硬殼；而傳說，iPhone殼係全世界最貴嘅膠……
其實叫軟殼，不如叫膠套。記得初初用手提電話時，都有買過唔同類嘅膠套，主要係用矽膠製造、奶白色好鬼核突嗰隻，同全透明就咁笠住嗰隻。矽膠套用得一排就會油淋淋，而透明套就會變黃同好易爛，所以過咗一排，呢兩種套都好少人再買。
人係好鬼衰嘅，迫住用套，但又想個Feel係用咗好似冇用咁，所以而家嗰人買得軟殼，一定追超簿，好似我試笠呢隻話只有0.03mm，要攞上手好feel嘅包滿意，唔會淨係識講手感不俗。
用咗一輪Bumper，一套上手真係有啲唔慣，簿到爆！部機感覺細咗，攞上手同「裸跑」一樣咁滯。基本上個殼可以笠晒成條邊，要露嘅就俾佢露返出嚟，唯一可惜就下面個充電位包唔到。其實用得呢種較硬身嘅膠，利用簿呢個優點令個殼有彈性，應該可以套埋下面。至於點解唔笠埋，除咗同細路仔要著開襠褲抖氣一樣之外，就真係要問返廠先知點解喇。
另一種係硬殼，顧名思義，用料主要係硬膠素材，但硬膠並非一定「咯咯」聲嗰隻膠，亦有啲本身帶有一定程度彈性，用嚟承受撞擊。硬殼嘅好處係保護性更強，但一定會令部電話厚咗兼大咗，但如果有花紋，基本上都會印得靚啲同襟磨啲。
基本上我唔太鍾意用硬殼，除非佢啲圖案好正，或有啲好精嘅Slogan。咁講，OZAKI呢個系列又係幾抵死嘅，明玩Apple後面個蘋果，變晒其他生果，過癮得嚟又冇違和感嗰下好玩嘛，套咗落部機度仲有令我有種懷念返iPhone 3G嘅情懷，好Amazing囉！
雖然，我都知會有人話：「唓！咪又係揀個款，吹水。」係，外觀係好重要嘅，但買完件嘢冇用，咁又何苦呢？每件產品都有佢特點，唔係點解要出咁多款呢？當然，有好多為出而出嘅產品，其實同製造垃圾冇分別，咁我會用行動去抵制佢喇。
基本上講殼都殼得七七八八，如果你睇到呢度都未放棄，希望你睇完會大概識揀啱自己心水嘅殼啦。
